Tel o ´70 the ´80 berša e Elena Lackovo chudľas te vakerel pal peskero dživipen la Milena Hübschmannovake. E Hübschmannovo has lakeri amalkiňa the nekbareder gadžikaňi ekspertka pre romaňi čhib the kultura. E Hübschmannovo zachudľas o vakeriben pro magnetofonos, prethoďas les andal e romaňi čhib andre čechiko čhib, kerďas editorsko buťi u kisitinďas o vakeriben kijo avridiňipen tel o nav „Narodila jsem se pod šťastnou hvězdou“. E ginďi has avridiňi mek ča andro berš 1997, paľis has prethoďi andre anglicko čhib (avridiňi andro berš 2000).
E genďi vakerel pal la Lackovakero dživipen, zachudel e etapa andal lakere čhavorikane berša andre romaňi koloňija dži ke lakero phuripen (berš 1980). Perdal o dživipnaskero vakeriben the perdal la goďavera džuvľengere jakha šaj dikhas oda sa, sostar o Roma andre bišto šelberš pregejle u so zadžiďile andre čirlatuno Československo. Pre jekh sera e Lackovo has komunistas, kerelas buťi vaš o Roma u šegetinelas te pherďarel e politika, savi vaš o Roma o komunisti kisitinde. Pre aver sera has e Lackovo goďaver romaňi džuvľi, savi bariľa avri andre romaňi tradicija the džanelas, sar dičhol romano dživipen maškar o gadže. E genďi zachudel, sar kole duj poziciji buterval maren jekh andre aver. Tiš sikhavel lakeri zor te šegetinel the feder te kerel e situjacija le kheratune Romenge, pre saven zorales dopejľa e perzekuzija perdal o baro mariben. O romane komuniti dživenas perdal (the buterval the pal) o mariben andre izolacija the o raja kadi phari situacija buterval ča ignorinenas. Lakeri buťi vaš o Roma la anďas maškar o džene, save pes marenas vaš e romaňi emancipacija.
O vakeriben tiš sikhavel genderova temi – e Lackovo has džuvľi, savi dochudľas emancipacija aščal peskeri buťi. Pre aver sera lakeri fameľija has tradično the konzervativno u e Lackovo mušinelas te džanel sar so neklokeder te phirel maškar kole duj poziciji.
E Hübschmannovo (savi prethoďas o vakeriben andre gadžikaňi čhib) kamelas te mukhel andro prethoviben e elegancija, savi pes garuvel andre originalno romano vakeriben – o vakeriben nane komplikovano, aľe džal sar paňi u e Lackovo džanel te vakerel kultivovana čhibaha. E insidersko perspektiva hiňi andro prethoviben bares zoraľi, bo e Hübschmannovo mukhel than vaš o romane lava, save pes na den lokes te prethovel - romane lava perdal bare historicka momenti, kulturna tradiciji the praktiki, tradična goďaver lava phure Romendar the aver. Oda sa šegetinelas la Elena Lackovake feder te ilustrinel varesave momenti andre lakero dživipen the peskeri perspektiva.