Naj lendi nisavi sama vaš kadala so ačhile dživde
Ko Novembri 1945 o Petrus Johannes Vos, bijamo ando Amsterdam ko 1874, hramosardas lil e foroske šerutneske andi Zutphen komuna te arakhel so džanen e institucije, vareso vaj na vaš oleski čhaj thaj olaki familija. O lil sas leske but sigo palpale irindo. E foroski kancelarija dijas leske palpale hramope pe lesko lil: e manuša save so bešenas ande Laarstraße 85 sas akhardine te aven ki foroski kancelarija, numa amaro akharipe irindo sas palpale vakerindos kaj pe kadi adresa khonik naj. E rajeske Vos sas phendo te adžikarel, te šaj te dikhen ande manušengo registro so si planirimo te kerdolpe »pala varesavi vrama ko avutnipe«.
I familija ačhilas phučipasa so kerdilaspe olenge familijasa vaš e but berša. I Jacoba Weisz (b. 1916) sas, khetanes olake rromesa Johannes (1914) thaj olenge trine čhavenca Augusta (1939), Johanna (1941) thaj Emile (juni 1943), deportirime perdal o Lager Westerbork ando Koncentracijako thaj Mudaripasko Lager Auschwitz-Birkenau ko 19. Maj 1944. I Jacoba Weisz thaj olake čhavore muletar kote; paćalaspe kaj sas mudarde ande gasoske komore pe raći maškar o 2. thaj 3. Avgosto 1944 kana o »Zigeunerlager « ando Birkenau sas muklo thaj sa e phangle manuša murdarde sas. Vi o Johannes Weisz na ačhilas dživdo. Ando Birkenau vov sas alosardo te kerel buti zorjasa thaj transferimo si ko 3. Avgosto 1944 ando Koncentracijako Lager Buchenwald thaj kotar ando Koncentracijako Lager Mittelbau-Dora, kote so mulas ko 13. Novembri 1944 ko avruno Lager Ellrich-Juliushütte.
Sa so ačhilas pala o Petrus Vos sas jekh nipo: o majphureder čhavo kotar oleski čhaj Jacoba thaj o Johannes Weisz, Johan Weisz, pindžardo sar Zoni. Bijamo ko 1937, o Zoni naj sas ande Zutphen sostar i racija sas ko Maj 1944 thaj vov garavelaspe ke peski bibi. Sostar vi vov trubujas te ovel deportirimo, jekh holandijako policajco ažutisardas le te našel thaj vov gurudolas ande veša thaj ke farme sa džikaj ni gelotar ke pesko papo thaj mami.
Sar e Zutpheneske institucije dije palpale o rodipe kotar o Petrus Vos, tipikano si vaš e Holandija pala o 1945 berš. Kadala so ačhile dživde pala o Samudaripen sas ačhavde korkore te agorin peske dukha vaš olenge majmangle mudarde, dukhasa so hasarde sa so sas olen an lengo trajo thaj mukle sas korkori peske. O oficijalno dokumento vaš e dadesko meripe majanglunes sas dindo ko 1948 berš. Vaš e aver familijake džene vi dureder naj nisavi informacija.
