Khana o Romano feminizmo avela teatro

Šaj, numa pe nekobor thana, te del pes jekh litera buteder pe varesavo titlo/alav/ šaj te transformirinel o čačuno alvesko phenibe doborom radikalno, sar so kodo kerdas an pesko histrikano show e tatareski kompanija vakerdi Giuvlipen (Feminismo, pe rromani čhib), »Gadjo Dildo« (2015). Numa jekh litera, i »d«, modificirinela sa thaj kerela jekh javereder estetikano, poetikano thaj politikano preiranibe, šaj phenel pes vi sarkastikano dikhipe upral o filmo »Gadjo Dilo« režirimo kotar o Tony Gatlif. Direkcijencar dendine kotar o Mihail Lukacs, e akterura, Mihaela Drăgan, Zita Moldovan thaj Elena Dumincăgive dživdipena trujal i buči pe lucidno thaj ironikani reprezentacija kotar e trin arhetipura save so sikavena o drom kote so e aspiracija e duhura, o mangipena thaj e projekcije, prezentirinena e džungale duho ande dominatno societa, limitirinena e Rromane džuvlen pe lengo muj. I misterija, o egzotizmo, e deformiribaskere stereotipura, i hiper-seksualizacija thaj ekscepcionaliteto si sikavdine bizi tabu sar bare pharipena save so trubuj te oven dekonstruirime. O aktero thaj koreografo Paul Dunca, an peski rola sar Ceremnonijengo Mastero, e muja/karakterura/ Sidonia, Stela thaj Vanessa, save so pe varesavi muzikani performansa pherdi hiperbolencar thaj provokacijasar, perfektno sikavena butaspektongi neuroza so isi e gadžes vaš e Romnengo feminiteto.

E »Gadjo Dilo«-ski denuncijacija si evidetno, ki luma kote so dominirinela i opresivno gadžeski zor, e Rromane džuvlja phagena o revolucionarno drom e phanglimasa so khamen te sikaven. Sidonia, Stela thaj i Vanesa na numa so haljovena i enigma, fantazija thaj rasizmo upral lengere dživdipena doborom lačhes, von dureder kerena vi dijalogo olencar, dikhea pes olencar muj ko muj thaj pe agor phagena olen. Anglal »Gypsy Experiencie« kreirimo thaj rodimo vi jekhvar, vi jekhvar, kotar e nasvale manuša saven so isi phagerdi ideja vaš e magika, holi thaj biladž, so si, sar so von phenen e karakteristike kotar o Rromengo identiteto thaj savo so simbolikano učhipe si materijalizirimo ko Rromane džuvlja, o Giuvlipen vazdela thaj promovirinela i totalno destrukcija pe gasavo mito, karikatura thaj arhaikano rasistikano romantizmo. I muzika kotar o Ion din Dorobanti thaj e kostumura/uravimata/ katar e Diana Bobina čhivena kruna upral kodo cabaret show savo so na darala te sikavel e trušalkerde droma kote so arakhena pes e artistura. Jekhe rigatar, phutardes kritizirinela pes o dominatno sistemo thaj javere rigatar, trubuj te anen pes teli phučibe so adžikerena korkore e rroma kotar olengere deja, phenja, čhaja thaj kompanonija. E rroma katar e komuniteta khamena, garavindoj pes teli o rromanipe, te maskirinen e džuvlengi telutni pozicija savi so čhivela pes teli i roš katar e perverzno forme kote so sikavela pes olengo patrijahalizmo. An kodo proceso o show Gadjo Dildo, phagela e hohavne funde kotar o heteroskeskualno režimo vaj e tradicionalno formen katar e phrandin, terdindoj anglal e barijere so sikavena pes anglal e džuvlja thaj dela provakacija vaš e džuvlengo zuraripe. Adžare, o femnizmo, anti-rasizmo, o seksualno disidentizmo thaj i dramaturgija heminena pes ko jekh, rezultirindoj kodolesar so i Claudia Ciobanu akahrela sar »Rromane Revolucijaki Avangarda, maripe – trujal arti thaj aktivizmo – pala but šeleberšipaski opresija«