Bibaxtalipe jekhe dajako so ačhili korkori

I Clara Léonie Cal, bijandi po 14. Januari 1925 berš ko Tarcienne (Belgija), po Decembro 1942 berš avilas ki policijaki Filijala vaš e avrutne thaj rodijas te ovel olako rrom o Zolo Karoli pe slobodija muklo, so phanglo sas ko phanglipe Rekem (Limburg) kotar o 19. Oktobri 1942 berš. Te šaj te bijanel, i Cal trubujas te lel sama pe olako čhavo o Xavier, bijando po 13. Juli 1941 berš, korkori musaj sas te lel pe peste i buti – i familija kerelas buti e grastenca thaj olengere kino-bikinibasa. Po 16. Decembro 1942 berš, o direktori katar e Policijaki Filijala vaš e avrune o Robert Standaert, bičhaldas jekh lil kote so sas oficijalno phendo kaj lako dad thaj daj šaj te ažutin e Clara.

Po 18. Marto 1943 berš voj bijandas pire čhaves e Louis Josephes. Olako rrom sas avri muklo pala šov kurke. Sa e familija sas phangli ko Tournai (Belgija), po Novembri 1943 berš, bičhalde si ko tranzitno Lager ko Mechelen thaj odotar si deportirime ando Koncentracijako thaj Mudaribasko Lager Auschwitz-Birkenau. Olako rrom thaj olake duj muršora mule odori. I Clara Cal sas jekh kotar e 32 džene so ačhile dživde kotar e 351 dženengi grupa deportirime ko Birkenau pala o atako pe Belgija thaj pe upruni Francija ko tomna po 1943 berš. Kana irisardaspe palpale, voj po agor ačhili korkori. E buća lendine olatar naj sas olake nikana irisarde palpale, vaj palem voj ni lijas nisavi kompenzacija sebet kodo kaj sas ko phanglipe thaj peske familija kaj xasardas. Voj mulas po 29. Januar 1959 berš ko senatoriumo Bonheiden, sas ola numa 34 berš.