O Alfred Lessing bijandilo 1921 ando Njamco. Leski avtobiografija Mein Leben im Versteck: Wie ein deutscher Sinti den Holocaust überlebte (Muřo trajo ando garudimos: sar jeg njamcicko Sinto preživisardja o holokausto; dikh e tekstoski proba), anklisti 1993. Ande peski avtobiografija ramol, sar nakhadja vov pesko trajo sar njamcicko Sinto ando Njamco, kaj sas vov o ciljo progonosko. Ande peski knjiga del pe godji, sar mundarde leskê dades dabenca ande ‘k rasističko ataka. Pe kuća vrjama, o Alfred sas štare bêršengo. Pala kodja trajilas vo ka jek kak ande severno Njamco.

O Alfred gilabelas pe djesgitara thaj avilo jek profesionalno muzičari. Katar 1936 źi 1939, vov phirelas jekha americkona muzikaka grupasa. Pala kodja kandelas e njamcicko armija, te bi garavelas pesko sinticko koreno, pe ‘k vrjama kaj barilo o rasističko bilaśimos. Kana dine le gaźe pe lesko čačo identiteto, nakhadja vov o dujto ljumako marimos ande l’ phanglimata, anglal ando foro Lemberg/Ukrajina thaj palal ando Njamco. Maškar le diverzni phanglimata ando Njamco, vov kêrlas muzika jeka grupasa kata KdF (»Kraft durch Freude« [›Zor lošatar‹]). Pe kaća sama arêslo lo v’ ando Buchenwald kaj ankêrelas jek koncerto le logoroskê štražarjonca. Numa kodja, kaj źanglja te garavel pesko čačikano identiteto, skepisardja les t’avel phandado ande l’KZ-ur.

Pala o marimos phirelas thaj ankêrelas performacije peska řomnjasa. Vov rodelas pale thaj pale kompenzacija pala pesko progono, numa e kompenzacija dije les xurde, xurde kotorende.

(Translacija Mozes F. Heinschink)

Bibliografija

Lessing, Alfred. 1993. Mein Leben im Versteck: Wie ein deutscher Sinto den Holocaust überlebte. Düsseldorf: Zebulon.