O Dragan Jevremović bijandilo 1946 ande Ibarska Slatina, alb. Sllatinë, Kosovo (pe Jugoslavijaki vrjama Srbija) thaj barilo ando Baljevac na Ibru (ande Srbija). Pe kuća vrjama nas problemo te ankêren le Kaldêraša pesko tradicionalno zanato, te kêren kêkavja thaj te hanon, kê sas len zanatosko dozvoljako lil pala mobilno trgovina. O Dragano sićilo pesko zanato de cînjařa thaj paso-pasostar kêrdilo jek artističko specialisto pa xarkuji, rupuji thaj sumnakuji bući.

Paša peski formativno artističko bući le metalonca ramol lo vi poezijakê tekstur. O Dragano avilo sar Gastarbeiter ande Austrija ando bêrš 1970 thaj kêrelas katka bêršenca bući ande firme kaj sas phangle metaloska bućasa. Po gor aśilo lo peska familjasa permanentno ande Austrija. Ando bêrš 1991 formirisardja vov o Romano Centro avere źenenca thaj bêršenca sas le řomane Centrosko genereralno sekretari taj lesko presedniko. Le anglune bêrš kata 2000-utne bêrš sas vov vi parlamentosko presedniko kata maškar-themutni Romani Unija.

Lesko repertoaro kata paramiča, kata priče thaj specifično kata anegdote sî desja baro. Vo malavel:

»Ašundem ande kodja vrjama, kana nas amen aver so te ašunas, kana nas amen aver so te dikhas, kana nas televizija, nas radio, nas aver khêlimata. […] Kê numa atunč paramičasa šaj kamas nakhaves e vrjama, te na źas te sovas.« (Fennesz-Juhasz et al. 2012: 398).

O Dragano mothol, kê nas poćinde profesionalni paramičarja ande leskî grupa, ali sas preferencije pala laśe paramičarja. O modo sar von prezentirinas le paramiča, lengê gestikulacije, lengê specifični interakcije kana von mothonas paramiča vaj anegdote sas importantni elementur kata jeg laśi paramiči. Anda sja kodja sî lo desja cenime ande peski cigênija sar naratori.

Literatura

Fennesz-Juhasz, Christian; Cech, Petra; Heinschink, Mozes F.; Halwachs, Dieter W. (Hg.). 2012. Lang ist der Tag, kurz die Nacht: Märchen und Erzählungen der Kalderaš / Baro o djes, cîni e rjat: Paramiča le Kaldêrašengê. Klagenfurt: Drava Verlag, 399–456, 487–505, 521.

Fennesz-Juhasz, Christiane; Heinschink, Mozes. 2011. »Ich habe gesehen, wie die Suppe gekocht wird«: Ein Gespräch mit Dragan Jevremović / »Dikhlem, sar ćiradjol e zumi«: Divano le Draganosa. In: Romano Centro 70: 14–17.