O Flamenkosko biandipen aj, sheral, o biandipen kotar o anavjardo “Cante Gitano Andaluz” (Andaluzikano Rromano/Gitanikano Gilavipen) si len solduj but darrinja ando sociàlo bikomunikaciako vaxt so nakhljas o Rromano/Gitanikano Them palal o Baro Liipen (1749). I dar te irinen palem te aven astarde aj o tràuma kasqe djivinènas o Liipen musaj te ovèlas jekh hadini savi achiljas generàcia e generaciatar ando Rromano/Gitanikano Them.

I novèla “Cartas Marruecas (Lila kotar Maròko” (1789), kotar o lekharno José Cadalso, si jekh mashkar e angluneder liparipen avridino palo Liipen pe Rroma/gitànura andi Andalùcia aj pi lengi mùsika. O tèksto mothovèlas jekh juerga (xuèrga; Juerga si jekh tradicionàlo kidipen e rromensa (gitanensa) te gilavas, te khelas, te xas aj te pias.) e Rromensa/gitanensa ando jekh umalikano kher.

Bipachapnaste, ando akava vaxt si fermentisarindoj e kotara kotar o Cante Gitano Andaluz (Andalucikano Rromano/Gitanikano Gilavipen). E gilja kotar Tonás si djamavindoj aj e anglune flamenkikane gilavne sar o Kàko Luís el de la Juliana (Luis e Julianako) àba avridindjas leske kerimàta po bersh 1770 (Liviana -lokhi-, Toná Grande -Bari-, Toná Del Cristo -Kotar o Krìstos- aj Toná kotar e Pajaritos -Chiriklorre-). Ando shirdipen e XIXto shelibersheste o gilavipen kotar Toná ulavdjàsas dji ke 33 verver melodikane chanda kerde kotar Flamenkikane Rroma/gitànura kotar Xerez aj kotar Triàna. Takaj, o bareder kotor kotar akala gilia achile bisterde biregistràcia.

O gilavipen kotar Toná ovèla i bàza e gilavipnaske kotar Siguiriya savestar arakhas e anglune stìle ando shirdipen e XIXto shelibersheste sheral andi Triàna aj andi Kadizaki zòna.

Ande akala anglune flamenkoske vaxta arakhas jekh anav, jekh tasvir so si opralutni averendar. Si o rromano/gitanikano gilavno “El Planeta” (O Planèta). E anglune liparimàta lestar avile ande lekhavimàta kotar o malagikano lekharno aj politikarno Serafín Estébanez Calderón.

Estébanez Calderón (Profesòro kotar arabikani chib, politikarno aj lekharno) ovel o jèkhto intelektuàlno manush so mekhel lekhavdi liparipen kotar jekh flamenkikano fàkto; konkret duj kronikasa: “Un baile en Triana (Jekh khelipen andi Triàna)” (Semanario-1831) ta i “Asamblea General (Generàlo Kidipen)” (El Siglo-1845), so avridinjas telo seudònimos “El Solitario (O kòrkorro)”. Paleder, lela kotor andi kostrumbrismikani kompilàcia “Escenas Andaluzas (Andalucikane skèna)” (1847).

O kronìsta mothovel xarnikanes odobor so ondjol ande phende ondimàta: haljarel aj dushljarel e musìke jekhvaxte makhel literaturikanes e verver artisturenge save len kotor.

Andi leski jèkhto krònika “Un baile en Triana” (“Semanario”-1831), ikljol “El Planeta” sar opralutni tasvir mashkar e aver artisturendar aj kerel lestar jekh xarnikano mothovipen kotar leske gada aj leske masa; kotar adaja deskrìpcia, bersha paleder, o chiterno Francisco Lameyer kerdjas po lil jekh prototipikani tasvir savi achili e avindipnaske.

Kadial, o lipardo djeno lel jekh vasno moldaj andi flamenkikani musikaki història pirdal lenge artistikane shajnimàta: si o jèkhto flamenkikano artìsta, andi akava artjaki històriate, te “ikljol lilende”.

Odoleske, akaja si i jèkhto musikàlo kritìka kotar o jèkhto flamenkologìsta e jèkhto artìstoske prindjardo ando flamenkikano anavesko kram:
“Dinjam andre kana o Planèta, phuro gilavno, aj baro chandesa, palal e djante, shirdèlas jekh romànza ja korrida palal jekh prelùdios kotar i vihuèla aj duj mandolìne, save kerènas sheral i orkèsta, aj shirdjas okola girvale bashimàta kotar i prìma, poshavde okola melankolikane hadinja e bordonestar, nakhindoj sa ando jekh pharo aj sovlaxano chand, varavar, sar te ginel maj feder, malavindoj o djantro basharno kovles o bashandesko tràste/frèto, kodo barjarel i jashinali shunitrengi sàma. Shirdjas o gilavno jekh lungo uv, aj paleder jekh xarnjorro achavipen, phendjas i but shukar romànza kotar o Conde del Sol (Kònte kotar o Kham), so, sostar lako sadipen aj phurano gundj, sikavel duzles o vaxt kotar avel.” (Escenas Andaluzas. -Ed. Cátedra.1985.-pág. 253 y 254 [Andalucikane skène -Ed. Cátedra,1985-, riga 253 aj 254).

Paleder, avridinjas neve lekhavimàta so liparen les, so vazdaren leske kerarnikane aj interpretativikane shajnimàta; àma na sas dji ko bersh 2011 ke avel amenge neve dàta po “El Planeta”: buchjòlas Antonio Monge Rivero, biandilo ando Kàdiz (1789) aj muljas ando Màlaga (1856). Sas rrom/gitano aj masàri leski familjatar.

Vipal djanas so, uzal te therel masarenge kinbikinja, sas lacho gilavno aj gitarìsta, vi te interpretisarel vi te kerel. Leske performàncie acharen te aven ande privatone biava kaj akharde les, uzal te gilavel aj te bashavel, kàste rendarel o artistikano grùpo. Leski tasvir sas shundi ando odavaxtuno flamenkikano berno aj tràdel artistikanes ande maj buteder kotor kotar Andalucìa. Vi geljas butivar ko Madrid.

Romànza, Pòlo, Kànja, Toná aj Sigirìja sas leske maj kamle gilia, aj, kotar sa lendar, mekèlas skòla so djantrikanes sikavdjas e leski avindi pashutni gilavnengi generàcia; mashkarlende si te vazdas “El Fillo”, vi rrom/gitano aj shirdavno kotar jekh sasti flamenkikani skola kotar o rromano/gitanikano gilavipen.

Sam amen, odoleske, anglal o jèkhto baro gilavno kotar i rromano/gitanikano flamenkoski història. Jekh manush so dindjas fòrma e gilavimatenge so sikavdjàsas aj okotar mekljas jekh gilavipnasko chand savo paleder ovèla jekh modèli e avinde generàcienge thaj uzal mekljas sar kontribùcia numal jekh xodutni gili. I anavjardi “Siguiriya del Planeta (Sigirìja kotar o Planèta)”. Jekh musìka savi bashel puranes aj xodutne kotorensa kotar i rromani/gitanikani musìka so ingjaren amenge ko XIXto shelibershenqo shirdipen. Lesko maj baro sikljovno sas “El Fillo” aver rrom/gitano musikako keravno kon barvaljardjas o musikàlo alavàri kotar o rromano/gitanikano andalucikano gilavipen.

Chaches, sas akava sikljovno kon dindjas te prindjarel leski prashundi Sigirìja, andi kabalki vèrsia, prindjardi sar “Seguiriya Primitiva (Purani Sigirìja)” aj registrisardi anglunes kotar o Pepe Torre (Manuel Torreko chacho phral) andi “Antología del Cante Flamenco (Antològia kotar o Flamenkikano Gilavipen)” (Columbia-1959):

“A la luna le pío, / la del alto cielo. / Cómo le pío, le pío, / que me saque a mi pare / de donde está metío.”

“E chonestar mangav, / okova so si ando ucho devel. / Sar mangav les, mangav les, / so ikljol me dades / kotar si phando.”

Phenen so lesko anavorro “El Planeta” avel leske sostar gilavèlas butivar akaja gili kaj puchel e choneske te adjutisarel peske dades.

Ando avindo lìnko shaj te shunas trin vèrsia kotar i Planetaki Sigirìja, jekh musikàlo kotor kaj hamisarde pen i bareder/major skàla ta o frigikano mòdos ando jekh prashukar chand so ando vipal fràsa kerel modulàcie kotar major ki frigikano mòdus aj palem ko major sar dikhas ando satar kaj phenel “La del alto cielo (okova so si ando ucho devel)”. Akaja gili akharel pes Kabal acharel te avel gilardi te agòrdel o gilavipen kotar sigirìja sar jekh agor.

Akava vèrsia si kotar o Pepe Torre, registrisardi ando bersh 1959 e gitarasa kotar o Melchor de Marchena
http://canteytoque.es/planetapt1.mp3