O Georgi Parushev (Георги Парушев, 1950–2018) bijandilo ande Komluka, kaj sî e puraji řomaji mahala ande la Bulgarijako foro Sliven. Vov barilo ande řomaji grupa Bajčari, kaj vorbin o drindaricko dialekto (https://perma.cc/KGC2-MMQX).

De kata o 19. šêlutno bêrš, pe industrijalizacijaki vrjama, le Slivenoski mahala sas laśes integririme ande lokalno društvo, taj le Řomengo edukacijako standardo sas skoro pe jek isto vučimos sar le gaźengo. Le Georgijoski univerzitetoski edukacija thaj vi leska řomnjaki edukacija po univerziteto nas koj izuzetko, nego univerzitetoski edukacija arakhadolas ande kaća mahala bute řomane familjende.

Pe socialističko vrjama la Bulgarijaki (1945–1989) o Georgi lja pe te ramol peomur thaj žurnalistički artikulur. Numa, kaj sas e tematika kata leskê knjigengê tekstur »Ciganijakê teme«, but vrjama či kamle le državni edicijakê khêra te ankalaven leskê tekstur. Pala pařuglipe la Bulgarijako pe ‘k demokracija formirisardja o Georgi o řomano žurnalo »Житан« [Žitan], ankaladja duj poezijakê knjige thaj ando bêrš 2007 ankaladja vov vi jek románo. Pe kaća sama sas vov o jedino řomano avtoro po Balkan kaj pe kuća vrjama publicirisardja jek románo.

O Georgi ramosardja pe bulguricko śib, numa leskê poemur nakhadile thaj publicirisajle vi pe řusicko, englezicko, francuzicko taj pe řomaji śib. O Georgi Parushev ankaladja jek antologija pa bulgarijakê řomane avtorur kaj sî źi adjes e jedino antologija. 2018 mêklja vov ande Sofia, Bulgarija kaća ljuma.

Biblijografija (Izboro)

Parushev, Georgi (ed.). 2002. Антология на ромската поезия. Antologija e romane poezijake. Anthology of Roma Poetry. София: Библиотека Житан [Sofia: Biblioteka Žitan].

Парушев, Георги. 2003. Лудница за цигани. София: Световит. [Parushev, Georgi. 2003. Ludnica za cigani. Sofia: Svetovit.]

Парушев, Георги. 2007. Хамали на илюзии. София: Български писател. [Parushev, Georgi. 2007. Hamali na iljuzii. Sofia: Bălgarski pisatel.]