O Gheorghe Păun-Ialomiţeanu bijandilo ka 19. juli 1957 ande Dragalina ando becirko Călărași ande Rumunija. Vov źalas ande ‘k texničko škola pala kodja produžisardja peski edukacija pe inžinerengi sekcija, pe khêrengo-, trenengo-, dromengo- thaj podongo sektoro. Vi pe sama kata računovodstvo sićilo.

De katar 1990 sas lo aktivno membro ande řomano miškimos thaj katar 1995 sas lo prezidento kataj fondacija »Pod peste suflete« (Djijengo podo‹) ande Slobozia, kaj sî o šêrutno foro katar o regiono Ialomiţa/Rumunija. Ande kaća pozicija sas lo responsiblo pala maj but projektur, pe sama kata l’ Řomengi kultura thaj edukacija. O Gheorghe sas jek kata l’ anglune řomane žurnalistur thaj editorur ande Rumunija, palaj revolucija kata 1989. De katar 1990 źi ka 1996 sas lo šêrutno redaktoro kata »Șatra liberă« ande Slobozia, kaj sas o angluno řomano žurnalo ande Rumunija palaj revolucija. O Gheorghe formirisardja vi »Pod peste suflete«, o angluno řomano publikacijako khêr palaj rumunijaki revolucija, vov sî o gazda thaj o šêrutno redaktoro kadale publikacijakê khêresko. Kata 2000 źi ka 2004, o Gheorghe sas redakcijako sekretaro kata »Asul de treflă« (Keco le organizacijeno), kaj sî o oficialno žurnalo kataj Řomengi partija. Pe isto vrjama sas lo o šêrutno redaktoro kata žurnalo »Tribuna Ialomiţei«, savo anklisto ande Slobozia. Ando bêrš 2004 sas lo responsiblo palaj edicija thaj redakcija kata »Rroma Almanac«. Pe kaća vrjama (2018) sî o Gheorghe gazda thaj šêrutno redaktoro kata publikacijako khêr »Șatra«.

Paša pesko angažmano pe literaturaki thaj kulturaki sama sas o Gheorghe vi aktivno sar municipalno većniko ande Slobozia (1992–1996) thaj regionosko većniko ande Ialomiţa (1996–2000). Ando bêrš 2016 lja vov o paćivako gradjanstvo kataj Slobozia.

(Translacija: Mozes F. Heinschink)

Literatura

Păun-Ialomiţeanu, Gheorghe. 1990. Arzoaica a stat la masă cu dracu. [The Loving Woman Set at the Table with the Devil]. Slobozia: Șatra.

Păun-Ialomiţeanu, Gheorghe. 1991. Bulibașa și artista [The Bulibash and the Actress]. Slobozia: Șatra.

Păun-Ialomiţeanu, Gheorghe. 2015. Ger blând de femarte [Gentle Frost in Fe-March]. Slobozia: Șatra.

Păun-Ialomiţeanu, Gheorghe. 2016. Bani bolnavi [Sick Money]. Slobozia: Șatra.

Păun-Ialomiţeanu, Gheorghe. 2016. Kai jeas, Rromale? Iubiri triste, cu parfum de șatră [Where to, Roma? Sad Love Stories with Roma Camps’ Perfume]. Bucharest: Romano Kher.