O Gonzalo Montaño Peña si ekh muzikologisto thaj rodavno, kon specializirisarda ando Flamenko. Vov thoda ekhe thaneste akademikano treningo e źanipenasa e intimnone thaj e pindźarde rigasa vaś o Flamenko Xitano.

Kaj avel katar ekh artistonengi familija, but katar kon kerde vastne (importantne) dipenata (kontribucije) karing o Flamenko, les sas les e privilegija te akhjarel o Flamenko Xitano dujeste muzikalneste thaj filosofikaneste źi kana vov barjarelas ekh fundakano źanipe kadale muzikake thaj tancoske.

Kadava muzikalno sikavno, Mastero pe Muzikologija thaj Kandidato pe Doktoroske sikavina ando e Sevilijako universiteto, ando momento kerel buki pe ekh teza vaś e romenge dipenata karing o Flamenko.

Vov kerda buki sar ekh kritiko pe muzika thaj źurnaliso vaś media, save si specializirime ando Flamenko, thaj kerda ekhe thaneski buki ande e produkcija vaś śoura thaj ramosaripenata.

Ando o 2014-to berś, vov kerda buki vaś e Europaki Komisija ande e Khukhin pe Koordinacija vaś Romane Politike. Ando momento, vov si ekh aktivisto vaś e xakaja (ćaćipena) e romane manuśenge thaj kerel buki ande e Fundación Secretariado Gitano (Fundacija Sekretarijato Xitano), savi arakhadol pes ando Madrid.