O Helios Gómez bijandilo 1905 ande Sevilla (Južna Španija) taj mêklja kaća ljuma 1956 ande Barcelona. Vov sas o prvo řomano poeto španijaka śibako. Prinźando sî adjes o komunističko aktivisto Helios, kaj mardja pe kontra o fašizmo sar političko artisto, leski literaturaki bući dabi prinźandi la (dikh Tjaden, 1996, 1998).

O Helios Gómez mulo ando bêrš 1956. Leski poezija perel andi sparta la avantgardističkone literaturaki. Formalno sas le Helioskê maj drago le strongi poezijakê forme sar kaj sî kodja o soneto thaj »romance«. O Helios teljardja te ramol već rano, numa tek katar o bêrš 1942, thaj tek pe vrjama kaj sas lo phandado (1945–1946, 1948–1954), lja pe vov maj but la literaturasa. Vov ramosardja duj esejur, duj historični novelur, save aśile fragmentur, jeg lungo avtobiografijako poemo anavesa »Erika«, thaj maj but de 100 poemura kaj tek 2006 ankliste tala le titulosa »Poemas de lucha y sueño« (dikh le teskstoskê egzemplur »Los Gitanos« thaj »No hables mal de los gitanos«). Sar avtoro, e konfrontacija peskê řomane identitetosa sî leskê jeg centralno tema. Lesko političko angažmano dićol ande leskê poemur, kaj sî len butivar jek militarno apelativno impetuso. Anda kodja perel lesko literarno delo pe angažirime literatura, pe estetično maripe kontra progono thaj diskriminacija.

(Translacija Mozes F. Heinschink)

Literatura

Gómez, Helios. 2006. Poemas de lucha y sueño. Barcelona: Associació Cultural Helios.

Literatura maj dur

Carballés, Jesus Alonso (2009): »Helios Gómez et la révolution: de la peinture à la littérature«, in: Études tsiganes 36: 38–59.

Tjaden, Ursula (1996): Helios Gómez Artista de Corbata Roja. Txalaparta, Tafalla.

Tjaden, Ursula (ed.) (1998): Helios Gómez. Valencia: Ivam Centre Julio González.

Homepage der Associació Cultural Helios Gómez: http://www.heliosgomez.org/index.htm [accessed 10 July 2018].