O Johann »Kalitsch« Horvath bijandilo 1912 ando Zahling thaj barilo ando južno Burgenland (kaj sas źi ka bêrš 1921 jeg kotor kata Ungro, pala kodja kêrdilo jek kotor la Austrijako). Tala Hitlerosko režimo – sar śav jekhe Sintosko thaj jekha burgenlandicka Řomnjako – sas lo deportirime ande diverzni KZ-ura. Leska angluna řomnja mundarde ando logoro Auschwitz kethane lengê trine śavořenca. Palaj slobodacija boldisajlo palpale pe pesko bêsîmasko than Oberwart (Burgenland, Austrija). Źi ka peski penzija kêrelas vov bući ando Beči sar gradjevinako bućari. Ando bêrš 1983 mulo lo ando Oberwart.

O »Kalitsch« sas ek xarismatično Řom cenime vi Řomendar vi gaźendar. Vov źanelas înkê paramiča thaj djilja pe řomaji śib; pala dujto ljumako marimos nas but źene maškar le burgenlandicka Řom kaj źanenas înkê but pa peski tradicija. Kongodi ašunelas leskê paramiča cenilas len zurales (Halwachs et al. 2000: 237–239). Vo sas eg źeno anda kadala cîřa burgenlandicka Řom kaj nakhenas źuvindes o holokausto thaj źanenas peska grupako kulturako mangin te den maj dur la nevja generacijakê.

Literatura

Samer, Helmut. 2003. Johann »Kalitsch« Horvath. In: RomBase. Didactically edited
Halwachs, Dieter W.; Gärtner-Horvath, Emmerich; Wogg, Michael (Hg.). 2000. Der Rom und der Teufel. Märchen, Erzählungen und Lieder der Roma aus dem Burgenland / O Rom taj o beng. Romane pamaristscha, phukajiptscha taj gila andar o Burgenland. Klagenfurt: Drava Verlag.

Horvath, Stefan. 2013. Atsinganos. Die Oberwarter Roma und ihre Siedlungen. Oberwart: edition lex liszt 12, pp. 33–39.

Wiegele, Miriam. 1979. »Die Zigeuner in Österreich«. In: Zülch, Tilman (Hg.), In Auschwitz vergast, bis heute verfolgt. Zur Situation der Roma (Zigeuner) in Deutschland und Europa, Reinbek bei Hamburg, 1979, pp. 261–272, p. 265.