E Lakatos sas ekh katar e deśduj ćheja thaj źuvlja kon kerde alavphandipe (kontrakto) e Ansamblosa o Rajkó ando o 1960-to berś. Te phendol pes kaj voj inklisti katar ekh muzikalno familja si zalaga (xanci). Lako papu katar lake dadeski rig sas ekh katar e ekhtone (avgutne) romane baśalne (muzikantura) kon kerda śkolipe ande e konservatorija – e Pragaki Konservatorija. E Lakotos-ako kako, o Sándor, sas khajma o śerdavno romano violonisto ande peski generacija, thaj lako dad, o Floris, i vov baśalda ande gadaja orkestra. Katar laki dejaki rig voj sas familija e Gyula Farkas-esa, o artistikano śerutno vaś o Rajkó. Ando ekh televizijano intervju ando o 2002-to berś (kana sas e Rajkó-sko deśupandźto berśipe), voj phenda kaj voj kerda kandidatura sar ekh gilabavni ando o Rajkó kana voj sas 11 berśengi, peske zalaga maj phurane amalesa - o Jenő Csocsi Lendvai – sar lako akompanisto. (Vov sas ama ekh kotoravno vaś o Rajkó sar ekh violonisto). E ansamblosko keravno śerutno, o Pál Szigeti, kerda komentaro kaj laki lali (glaso) sas laćhi, ama terni; pe saveste o Farkas phenda, “Tu sikjos violina, na?” thaj anda la ando o grupo sar ekh violonista. Voj eventualno aćhili sikavdi primás – kombinirime koncert maestra, konduktora, thaj solista – naj sade ande reguljarne permormaicije ama i ande dokumentalne filmura save sas sikavde maj anglal.

Kaj si kotor katar ekh ansamblo kadava sas maj but katar ekh baśalipenasko śajpe: lako maj terno phral phenda kaj von “barile ekh averesa” ando o ansamblo. Źi ando o 1967-to berś, e data vaś o dokumentalno filmo, e duj voj thaj o Lendvai sas primasura ando o Rajkó, thaj von line pe (surisale) ando o 1968-to berś. Kaj sas śajpenata te źan ande maj ućhi śkola, voj phenda, ama “kadava ni sas e prezumpcija, soske ame gelam avrjal o them but devrja.” Ando o 1974-to berś, lengo ćhavo o József sas bijando, pe savi vrjama von e duj inkliste katar o Rajkó, o Lendvai te putrel peski restorantoski orchestra thaj e Lakatos te lel sama lenge khereske thaj ćhaveske.

Maj but katar o cikno numero romnja kon baśalde ando o Rajkó si phende kaj von koncentririsale po kher-keripe palal te inklen katar o ansamblo. Terne źuvlja sas zoresa thodine karing e kher-keripenaski rolja naj sade katar e vrjamake źeneske (dźendroske) roljake aśugjaripenata ama i katar e logistike vaś o bijanutnipe. Restorantoske bande normalno kerenas buki barem źi maśkar e rjat thaj śaj baśalen i maj but te e manuśa denas laćhe love, thaj em e laćhe baśalnen sas len lovale śajpenata te źan avrjal o them; te e duj bijanutne sas restorantoske baśalne, e ćhavengo samalipe (griźa) ka avelas but pharo. Von śaj den i pesko muzikalno treningo peske ćhaven. Ande e alava e Erzsébet-a Katona-ke: “kadala źuvlja sikaven peske ćhaven sar te baśalen … fantastikaneste.“ E Mariánn Lakatos-ako ćhavo o József Lendvay kerda treningo ande e Liszt Akadenija vaś Muzika thaj la varesave maśkarthemutne (internacionalne) violinake kompeticije.