O Mihail (»Mišo«) Petrov Georgiev (Михаил Петров Георгиев, 1968–2011) sas jek Erlisko řomano aktivisto, poeto thaj naratori, savo bijandilo ande Sofija/Bulgarija ande řomaji mahala Fakulteta. O Mihail sas jek anda l’ trin śave kata o aktivisto Peter Georgiev, savo sas membro kataj bulgaricko komunističko partija thaj savo bêršenca angažirisajlo pala socialno edukacijaki promocija le Řomengi ande Fakulteta.

Ande l’1990-utne bêrš, o Mihail Georgiev formirisardja e organizacija »Romani-baxt« ande Fakulteta. Kaća organizacija angažirisajli projektonca te peravel e segregacija pe edukacijako sektoro, thaj mardja pe kontra diskriminacija thaj kontra o dukhavimos le manušîkane čačimatango. Pe sja kodja vrjama, e organizacija služîlas vi sar administracijako centro kata l’ Sofijakê Řom.

Anglunes o Mihail ramolas poemur pe řomaji śib sar hobi, ali o Hristo Kyučukov dja les zor te publiciril peskê buća. Sar editoro o Hristo nakhadja le Mihailoskê angluji poezijaki knjiga pe bulgaricko śib.Vuni kata leskê poemur kêrdile tekstur kata l’ popularni gilja, save gilabenas le řomane muzičara. Adjes, leskê poemur sî oralno folkloro le Řomengo ande Fakulteta.

O Mišo Georgiev sas jek talentovano paramičari. Leskê priče sas inspiririme kata l’ komunakê realni pecimata, kata svako-djeseskê djeli, thaj kata Řomengê paćamaskê ideje.
Bezêx, leskê oralni priče či ramosajle, naj dokumentirime, naj ramome sar leskê poemur.

(Translacija Mozes F. Heinschink)

Alome bibliografija

Petrov, Mihail. 1996. Mo Vogi / Душата ми [Dušata mi]. Sofia: Balkanikani Fondacijape Interkulturake Edukacij »Diversity«.

Georgiev, Mihail. 2004. Лъжовни очи / Xoxavne jakha. София: Иктус Принт ООД. [Sofia: Ictus Print]

Petrov, Mihail. 2008. Лъжовните ти очи изгориха душата ми / Te xoxavne jakha tharde mo vogi. София: Дими 99. [Lăžovnite ti oči izgoriha dušata mi. Sofia: Dimi 99]

Petrov, Mihail. 2016. Mire gilja. Sofia: Paradigma.