E phralja Oskar Rose (1906–1968) thaj Vinzenz Rose (1908–1996) sasa bijame ande Upruni Šlezia. Olengiri familija kerenas jekh kino/cinema ano Darmstadt sa džikote e Nacional Socialistura na ruminde olengo dživdipe ko 1937 berš. Pe vrama kana kerelas pes bari persekucija upral e Sinti thaj e Roma katar e Nacistura, i familija Rose kerdas deciyija te našel ko 1940-to berš thaj našle sa dži ki Šehoslovakia. E familijatar numa o Oskar Rose našlas thaj na phagle ole ano koncentraciono kampo. O Vinzenz Rose thaj e javera familijakere membrura sasa legardine ko Auschwitz eksterminacijako kampo. Sa ko sa, deš thaj trin familijakere membrura sasa žertvi katar e Nacistongo genocide. O Anton Rose, e phralengo dad, sar vi e Vinzenz-eski duje beršengi čhajori mule ando Auschwitz, džikote olengi dej, i Lisetta Rose, hasardas pesko dživdipe kana transportirinenas ola ko džuvelngo kampo ano Ravensbrück. O Vinzenz Rose ačhilas dživdo ano Auschwitz sostar sas le baro talenti te bašavel citra vaš e bare manuša ande kampo. Vov sasa bičhaldino jekhe grupasar ande Natzweiler-Struthof koncentraciono kampo ande Alyas, kotor okupirime Francijatar, kana sasa čhutino teli eksperimento vaš o nasvalipe tifus. Kotar o aprilo 1944-tone beršestar dureder, vov sasa čhutino te kerel buči yorasar ande satelit kampo Neckarelz.

Pe kodi vrama o Oskar Rose garavelas pes ande Munich thaj teli lesko hohavno alav “Adler” [Čirikli], ažutilas peskere internirime familija. Kana astardas aprilo 1943-to berš, vov phenelas e rašajenge kotar e Katolikani Khangiri vaš e Sintongo thaj Romengo masovno deportacije ano Auschwitz. Numa sar te si, e rašaja našti sas te stopuin kadale minoritetoski sistematikani persekucija. Ko 30-to augusto 1944-to berš o Oskar Rose dijas slobodija peskere phraleske e Vinzenz-eske kotar o Neckarelz kampo. E duj phralja ačhile dživde dži ko maripasko agor ki ilegala.

Marenas pes dureder mamuj diskriminacija upral olengo minoriteto. Pala o 1945-to berš, e phralja Oskar thaj Vinzenz Rose, vi dureder marenas pes mamuj i diskriminacija upral olengo minoriteto. O Oskar Rose hačarelas pes došarelas pes vaš sa e manuša so mule oleskere familijatar. Pala e Oskar-esko meripe ko 1968-to berš, O Vinzenz Rose delas zor te prendžarel pes e NAcistongo genocide. Ko 1974-to berš, peskere fondencar vazdijas memorijalo ano nekanutno “Zigeunerfamilienlager” [Gypsy Familjengo Kampo] ano Auschwitz-Birkenau. Ko 1978-to berš, vov sasa o avguno Sinto so reslas Ordero vaš sa so kerdas katar e Federalno Republika Germania, vaš kodo so kerelas komunikacija thaj rekonsiliacija e mažoritetakere populacijasar. Oskar-esko čhavo o Romani Rose asistirindas ole ano 1970-tone berša te bajrarel pesky civilno hakajengi buči – kodolesar so kerdas o “Verband Deutscher Sinti” [Germanijakere Sintongi Unija] ano Heidelberg. Kodo si sar astardas o civilno hakajengo miškipe e Germanijakere Sintongi thaj e Romengi, savo so ko 1982-to berš phutardes kerdas pes politikani rekognicija katar e Federalno Kancelaro Helmut Schmidt. O Vinzenz Rose mulas ko 1996-to berš.