O njamcano (germano) sinto o Oswald Marschall sas bijando ando Minden/Westfalen ando o 1954-to berś.

Dekatar o 1963-to berś vov sas aktivno ando amatiorno bokso. Ando o 1971-to berś, vov khelda boks vaś o Njamcano themutno (nacionalno) ekipo vaś avgutne dromeske thaj kotorkerda (participirisarda) ando o Europano śampionato ando Kiev ando o 1974-to berś. Ando o 1978-to berś, vov agorisarda peski boksoski kariera palal 148 maripenata, katar save vov pelo sade (numa) 11.

Palal peski kariera sar ekh aktivno boksero o Oswald Marschall vazda o Boksklubo Minden e.V. ando pesko bijando foro e resasa (ciljasa) te zoravel o pesko-moldipe (ućoseripe) e terne sintengo thaj romengo via sportura, avrisikavipenata (ekzibizije), śkolipe (edukacija) thaj kherutni buki/sikavipe. Aver vastno (importantno) fukcija e kluboski sas o źanipe vazdipe vaś sintura thaj roma ando o butno (maźoritarno) źenipe (societeto).

O Oswald Marschall si o śerutno pe e Verein Deutscher Sinti e.V. Minden (Asocijacija vaś njamcone sintura ando o foro o Minden), savi sas kerdi ando o 2016-to berś.

O proekto „Echt Clever – Gewaltprävention durch Sport und Bildung “(Ćaćes godjaver – prevencija mamujal o dośkeripe /violenca via sportura thaj śkolipe) kerdo katar o Boksklubo Minden e.V. thaj Verein Deutscher Sinti e.V. Minden sas pindźardo katar o

Bündnis für Demokratie und Toleranz (Ekhthanlin / Alianso vaś demokracija thaj tolerancija) ando o 2011-to berś.

O Oswald Marschall si o Śero pe e Ulavin (Divizija) ka e Centralno Godjalin (Konsilo) e Njamcone Sintenge thaj Romenge thaj Vice-Śerutno pe o Centro vaś Dokumentacija thaj Kultura e Njamcone Sintengo thaj Romengo ando Heidelberg, thaj si i direktoro po proekto leske ofisoske ando Berlin.