Bijandi ande e Monagham, Irlanda, ekh irlandani phirdini e Triś Nolan phenel kaj e muzika sas ekh baro kotor katar lako ćhavrutnipe. Ande laki familija:

‘Sas [gadiki] naturalno te gilabel pe liberalno sar sas te vakjares. Sako drom sas khajekh te gilabel ekh gili turjal o than. Me ni barilem televizijasa thaj elektrikasa, ta me dav man godi paśal e memeljako jag-khelipe aj e kamposki jag orjat thaj e gilja thaj e istorije [thaj i] … e istorije turjal e gilja thaj o moralo ande e istorie aj e sikavina. Kadala istorije aśal e gilja śaj resen te keren paramići phenipenaske sesije thaj atoska ekh istorija śaj ingjarel palpale karing ekh gili.’

Familijake rakina sas tradine ando giljango gilabavipe savo sas palal-mukhlindo katar ekh generacija ande aver generacija ande e phirutnenge buxljarde familijasa. O Dubljano Thagarno Koleźo ando o Surgeons [Dublin’s Royal College of Surgeons], e Triś phenel, sigo da but zoralo dovodo savo si bazirime po DNŚ [DNA] kaj e phirutne ‘datirin anglal e keltikane vrjame thaj si thanutne ande e Irlanda’. Kadava liniape, e Triś phenel, si ‘reflektime thaj si i but dovodino ando o populjaripe vaś phirutne tradicije ande amari komuna’. Mujeski (oralno) tradicija si ‘but vastni [importantno]’:

‘But katar kadala gilja ande muri familija śaj aven palpale rodinde źi ka 150 berś aj maj but. Normalno e muzika ande amari komuna ni sas komersializime aj dikhlini sar ekh industrija katar e phirutne, maj but sar ekh źivdipenaski [trajoski] ćhan, kultura thaj lośkeripe. Tradicionalno, o gilabavno stilo e phirutnengo si biakompanirime. O gilabavipe fokusiril pes maj but turjal ekh forma vaś ekspresija ande e komuna kozom te lel pe sama pe gadava sar vov ka avel lindo katar e publike. Teorija vaś muzika naj generalno sikavdi ande e phirutni komuna, thaj but baśalen muzika palal o kan. Ekspresija si vastni thaj godidipenata [memorija] save inklen si ekhsave vastne. O dipe vaś e gilja thaj e istorije thaj o moralo vaś e istorija [si] katar but baro vastnipe.’

E Triś gilabel tradicionalne gilja, thaj i kuntri thaj uestern thaj peske lake originalne kompozicije, thaj akompaniril peske pe gitara thaj xarmonika. Laki zorali gili, ‘Phage Linije [Broken Lines]’, si autobiografikani. Kana voj sas oxto berśengi, e Triś sas lindi ando instuticionalno samalipe, barabari śtare katar lake phejenca. Pe gadaja vrjama, e phuvjake bare ni dine la nisavo mujphenipe thaj la ‘ni sas la nisavi ideja so aćhelas‘. But maj napalal sas kaj e Triś ginda ande dokumentura kaj e Irlandako śtato dikhla pe late thaj pe lake phenja sar ‘bidikhlinde‘ savo inklel katar lake familijako cikno loveanipe thaj ‘amaro phirdano źivdipenasko ćhan, sar kadava kaj sam nomadime’. E Triś aćhili ando samalipe źikana voj sas deśevta berśengi. ‘Phage Linije’, voj phenel, ‘vakjarel aśal o phago njamo vaś muro phirutno identiteto, savo o phagipe kerda ande mande thaj ande muri familija thaj aśal e phage linije vaś komunikacija maśkar beśline thaj phirutne komune‘.

E Triś vaźe gilabel but katar e phurane gilja save voj sikili katar peske bijanutne thaj maj bare paśutne źene. Adive, voj phenel, ‘e phirutne lungjavon ande e moderne muzikalne stilura save reflektirin e gremadin [societeto] ande savo ame akana źivdas thaj e barjardini kultura. Źi kana o tradicionalno sa ka aćhel mange o źanro kaj sas kotor katar muro ekhto [avgutno] muzikalno thaj gilabavno źanipe [eksperiensa], me adive kamav te serav muzika thaj gili katar sa e źanrura’.