O Valdemar (Val’do) Kalinin bijandilo 1946 ande Belarusija. Anda o foro Witebsk munčisajlo vov ande Řusija. Kothe sićilo pe ‘k pedagogicko fakulteto strêjini śiba. E katanija kanglja ande sovjeticko armija, thaj ande armija avilo oficiri. O Valdemar ankêrdja vi pala peski služba ande katanija pesko fizičko fitneso, kaj steknisardja vov ande sovjeticko armija. Pe vrjama peska službaki pařuglja vov pesko paćako drom thaj avilo evangelicko xristiano, kê nakhlo ande »Khangêři le phralengi«.

Kana getisardja peskê studije lja vov te kêrel ande Řusija bući sar sîćaritori thaj pala kodja sîcarelas vi ande Belarusija. Pe kuća vrjama lja vi te publiciril peskê anglune poemur ande l’ lokalni žurnalur. Pala Moskvako Teatro »Romen« sas vov śibako konsultanto palaj śib le Řomengi thaj vi konsultanto pala le Řomengê narodni khêlimata ande Kievosko Teatro »Romance«. Pe kuća vrjama lja pe, paso pasostar, te nakhavel e biblija ande řomaji śib.

Pala o xaimos kataj USSR akharde les le »United Bible Societies” ando Londono, te savetuil pe pa peska biblijaki tradukcija. Pala jek kurko kaj bêšlo lo ando Londono, phabardja vov peska biblijaki translacija so kêrdosas, kê či plačalas le čisar. Vov andja e decizija, te sićol e grekicko śib, ande saji sî ramome o Nevo Testamento thaj te nakhavel o Nevo Testamento pale, numa katar o originalo aj kojda tala o mentorstvo kata o Dr. Donald Kenrick. Po maškar kata l’ 1990-utne bêrš munčisajlo ando Londono.

Pe bax arakhlja vov jek bući sar edukacijako službeniko ka Inner London Education Authority (thaj palal ka Camden London Borough). Pe kodo than delas dumo Řomen, kaj rodenas azilo. Kadi bući dja les šansa profesionalno te ažutil Řomengê, thaj paša kodja aśilo leskê dosta slobodno vrjama, te kêrel peskê translacije thaj te lel pe la řomaja kulturasa thaj le řomane civilnone čačimatanca. O Valdemar sas ande bute organizacijende aktivno. Ando bêrš 2012 alosardilo sar presedniko ando Gypsy Council.

Desja prinźando sî o Valdemar pala peski trine śibengi poezijaki kolekcija »Romane sune« (2005, pe řomaji śib, pe belarusicko thaj pe englezicko śib). Ando bêrš 2014 nakhadja vov e antrego biblija pe balticko řomaji śib. Pala peski bući lja o Valdemar vi maškar-themutne paćiva thaj nagrade. Jek nagrada lja kata »Hirošimaki Fundacija palaj pača thaj Kultura« (Stockholm, 2002) thaj o angluno than palaj poezija lja kaj maškar-themutni artaki kompeticija »Amico Rom« (2016).

(Ilona Makhotina, Thomas Acton; translacija: Mozes F. Heinschink)

Lila

Kalinino, Valdemaro. 2005. Романэ́ сунэ́. Romane sune. Romani Dreams. Vitebsk: Vitsebskaya oblastnaya drukarnya.

Kalinin, Valdemar. transl. 2014. Библия пэ Балти́тко Романи́ чиб: Романэ́с. [Biblija pe Baltítko Romaní čib: Romanés]. Belarus.