Zoni Weisz, (bijando, Marto 4to, 1937, ando Hague) si Holandicko Sinto, zhivindo kathar o Holokosto thaj lulugjari.

Wo si o maj baro shavo kathar i Jacoba thaj o Johannes Weisz, muzikanto thaj lauteri, kaj sas les muzikitco komersjo ando Zutphen. Sas les trin phrala. Pe 16to Majo, le raziji te kiden le “gypsies/cigani” ande Nederlandija kezdisajle thaj Weisz thaj peski familija sas bishalde ka jekh zhandarenge mishkimasko kampo le Zhudovenge ando Westerbork.

Numa Jekh Olanditcko zhandari kaj sas membro ande resistancija protif le Nazistura, azhutisardjas o Zoni Weisz te skepil ando diferentno treno/dzhedzhesh. Le avre membri ande peski familija sas bishalde kaj Oshwica thaj maj palal, sas mudarde kothe vaj ando Mittelbau-Dora koncentrako kampo.

O Weisz dashtisajlo te aresel peske papura kasa beshlas zhi-ka o agor le marimasko. Antunchi o Weisz gelo palpale kaj shkola thaj djas gata peske studiji maj anglal kathar kerelas buchi sar lulugjango azhutori/pomozhniko.

Maj palal, chuvdas-pe ande hortikulturalno kolegija thaj kerdjas aplikatcija uspexosa vash sadosko sikajimos ka le Olandickone Krajitcko korto.Kana djas gata peske kwalifikaciji slugisajlo duj bersha sar katana ando Surinamo.

Kana amboldjas palpale ande Olandija, o Weisz kerdjas buchi vash o mishto-zhanglo lulugjari Georg Kirsch ando Amsterdamo thaj sikilo eksibicko arkitektura thaj artaki historija.

Ando 1958, o Weisz ljas kontrolo kathar o komersjo kathar o Kirsch thaj dubisardjas internacionalno levudimos anda peske eksibiciji. Wo sas chudo ande “The Guiness Book of Records” (le Ginesitco Kenva Rikordurengi) vash o maj baro lulugjango lasharimos ande luma.

Weisz kerdjas buchi vash le Olandickonja Krajicko Familija thaj reprezentilas la Olandickonja Lulugjangi industrija.

Sar viktimo kathar Nacionalno Socializmo, o Weisz si membro kathar o Olandicko thaj o Internacionalno Oshwicitca Komitiji thaj ingarel zhivindi i mimorija le Holokosteski kathar but aktivitetura. Ando Januvari, 2007, wo sas o maj baro vorbitori ka o phuterimos le eksibiciako “The Holocaust Against the Roma and Sinti and Present Day Racism in Europe – O Holokosto Protif le Romende thaj le Sintende thaj Akanipesko Rasizmo ande Europa” kaj sas wazdino ande la Kethanutne Nacijake Majbari Ofisa.

O Weisz si krisinitori vash la Europickonja civilnonja chachimatagi Negrada vash le Sinti thaj Roma.

Pe 27to Januvari, 2011, o Zoni Weisz sas o maj angluno reprezentivo kathar le Roma thaj Sinti te del vorba anglal le Njampcitcko Bundestag te komemoratil o “Holocaust Remembrance Day – Le Holokosticko Serimasko Djes.” Djas reflekcija pe i libertacija la Oshwicako thaj vorbisardjas anda peski personalni eksperijenciji.

Ando 2016, wo prezentisardjas peski biografija ande forma kathar audiobook: “The Good Life – Zoni Weisz narrates his biography. A varied portrait of an exceptional human being” – ashunimaski kenva: O Lasho Trajo – o Zoni Weisz mothol peski biografija (publisime kathar Verbrecher Verlag andi namzitzko shib).