Jekh trajo ke buteberšengi dar

O Louis Steinbach, pherde anavesa Antonius Lodewijk Steinbach, sas bijando Holandijako manuš thaj pe rromnjasa Rosina Weiss sas le trin čhave thaj trin čhaja. O angluno čhavo sas bijamo ko 1905 ando Njamco, sa avera čhavore bijande sas ande Holandija. O Louis Steinbach sas muzikanto, ba kerelas vi grastengo vaj tepihengo kino-bikinibe thaj kodoleske leski familija phirelas ki Holandia, Belgija thaj ko Nemcikano them.

Ko dopaš e 1930 berša thaj majbut kotar e Holandijaki thaj Belgijaki okupacija katar o Nemcikano Rajho ko 1940 berš, sa maj phares ovelas leske te kinel thaj te bikinel thaj te ačhol ando kontakto pe bare čhavrrenca thaj olenge familijenca. Ko juli 1943 andi Belgijaki komuna Hasselt o rrom thaj e rromni khuvde ando strancengo registro, kana nakhle kotar o Eindhoven te dikhen pe familija. Ko 10. Septembro o Louis Steinbach sas phanglo ki »Merksplas Kolonia« paš o Hoogstraten ki Holandijaki granica thaj oleski rromni ko jekh centro St. Andries paš o Bruges. Solduj thana, kotar o 19 šelberšipe sas centrura vaš e čorole manuša, thaj pal kodo kerdine sar phanglipa thaj ki Nemcongi okupacija sar kidutne Lagerja vaš e bukadar grupora thaj phangle manuša.
Nekobor lilenca o rrom thaj i rromni rodije, sar vi jekh olengo čhavo, te šaj ande Holandija nakhen. Ko18. Novembro 1943 dinde sas ki Holandijaki policija ando Woestweezel. Kodo dijas šajipe e rromeske thaj e rromnjake te našen kotar e Sintengi thaj Rromengi deportacija andar e Belgija ko Koncentracijako thaj Mudarimasko Lager Auschwitz-Birkenau. Numa, von musaj sas te daran vaš pengo trajo dujto drom: ko16. Maj 1944 kana o rrom thaj e rromni sas istarde ki racija savi so kerdilas vi ando Amsterdam. Naj džanglo sar našle kadale deportacijatar ko Tranzitno Lager Westerbork. Duj olenge čhavorendar, peske familijenca deportirime sas perdal o Mechelen ando Auschwitz.