»Cikánský tábor« ando Hodonín

Kotar o Avgusto 1942 berš, nesave Rroma andar e Moravia deportovime sas ando Hodonín u Kunštátu, Lager vaš e zoravni buti, legardo kotar o Protektoratosko anglošorutnipe kotar o Avgusto 1940 berš. Jekhe beršeske ando Lager sas bičhaldine dži ke 1,400 murša, džuvlja thaj čhavore. O Lager dikholas sar Koncentracijako Lager, saves sas funkcija sar »Cikánský tábor - Zigeunerlager«. Savore kote cidenas bokhatar, naj sas olen pibasko paj, sas len bilačhe higijenake šajimata, bilačhe dživdipaske thana. Savore save sas phureder deše beršendar trubujas te keren zorasa buti. Pe kodo avelas o džungalipe so kerenas e čexikane arakhavne manuša. Majcera 207 internirime manuša muletar kotar e džungali bešimaski situacija, kotar e epidemije thaj kotar e cikni sastimaski sama. Andar o Lager Hodonín, e internirime manušen deportirinenas ando Koncentracijako Lager Auschwitz. Majanglunes sas deportirime e bikamle Rroma, stigmatizirime sar »asocialni«. Majbut kotar e Lagereske manuša sas transportirime po 21. Avgusto 1943 berš ando Koncentracijako thaj Mudaribasko Lager Auschwitz -Birkenau. Kadi skurto postaki karta bičhaldas ko Karel Holomek leski e anavesa bilepardi familijaki dženi andar o Hodonín Lager. Pe kodi vrama, o Holomek sas bičhaldo zorasa te kerel buti kote so phagenas barra ando than Olšovec, avruno Lager kotar o » Lager vaš e dživinenge buća « ando Brno. E postake kartasa voj mothavdas oleske kaj von či džanen pe savi rig ka legaren olen. O Lager Hodonín sas mukhljardo kana astrdas o čhon Decembro ko 1943 berš.