O protagonisto e noveloso, o Peter mothol e priča jećhe romane društvosi ano jugo e Ungroso maškar o anglunipe e 20. šelutne brešeso thaj o holokausto. O Peter si jek dženo godole društvoso thaj mothol andar e andralutni perspektiva. Diferentno sar e aver membrura pire grupaće vov sasa vi an kontakto e avrijalutne lumjasa, značil, e lumjasa e gadžendji. Godolese džanel vov vi e avrijalutni perspektiva. Godo novelo iklisto an Njamco an o breš 1978 e titulosa »Bitterer Rauch«, verbalno »Ćerko thuv«, thaj an Britanija an o breš 2015 e titulosa »The Color of Smoke«, verbalno »E thuvesi bojava«.

E maj palune buća katar o Menyhért Lakatos si fragmentirime pe lendji struktura. Jek novelendji selekcija e titulosa »Csandra szekere«, verbalno: »E Csandrasi keruca« iklisti an o breš 1981 (thaj pe njamcicko čhib an o breš 1984 e titulosa ›Csandras Karren‹). Jek karakteristika e tekstondji an godoja selekcija si, kaj phanden-pe mitični thaj realni elementura. I novela »Egy Körös menti köztársaságról« (verbalno ›Anda e Vésztősi republika‹) si, po eksemplo, na numa jek mitično legenda, nego vi jek realistično prozako narativo. E novelako kontento ćerdilo e vrjamasa jek topos an e ungricko literatura. An o breš 2014 publicisarda o László Márton jek novelo »A mi kis köztársaságunk« (verbalno ›Amari cikni republika‹). Kothe vov ramosarda pa e isto tema. An jek intervjuo o László Márton liparel eksplicitno e Menyhért Lakatosos. An o breš 2016 iklisto jek filmo, so bazirisarda pe novele katar »Csandra szekere«.

Tipično an o literaturako kosmoso e Menyhért Lakatoso si, pe jek rig, jek realizmo sociografijaće detajlonca, na primer »Akik élni akartak« (verbalno: ›Godola sae mandjen te džuven‹, 1982). Pe aver rig leso kosmoso sikhavel mitura, legende thaj magični priče, sar po egzemplo »Hosszú éjszakák meséi« (verbalno ›Priče e lungone raćendje‹; 1979).