Ande e romane culture, njamoske strukture but devrja (butivar) vazden e manuśenge bukjarne źivdipenata (trajura) – te si e bimaśkaruni familija (ekh muzikalno proekto kerdo katar o dad thaj o ćhavo, primerno) aj ekh bizneso kaj del buki buxljarne familijake kororavnen (membronen). Ande religiozne, śkolipenaske (edukacijake) thaj aktivistoske proektura, i gathe, o ekhipe (koxezija) e familijake grupenge dikhlindol te khelel rolja, sar kana ekh romani źuvli śerutnil ekh terne manuśengo ansamblo, savo si asistirime katar lako em o terno ćhavo thaj savo thol adnre lake paśutnen thaj i avere ćhaven katar e komuna.

Ande e Finlanda, ekh numero vaś romane kulturlne aćhila (eventura) sas śerdine katar e Tuula thaj o Valfrid Åkerlund, ekh ekipo kerdo katar ekh rom thaj ekh romni.

Romane Devlikane muzika

E Tuula thaj o Valfrid Åkerlund si romane muzikantura ekhe repertoarosa katar but originalne gilja, em but źangle si e romane Devlikane gilja save von ramosarde ando o 1970-to berś. Pe gadaja vrjama, e Devlikani muzika – savi inklisti katar e finikani romani folk muzika – aćhili ekh laćhe kerdo stilo maśkar e roma ande e Finlanda, ekhe neve kulturasa vaś gilabavno –giliramosarve. Date but katar e gilja sas kompozirime aśal solo lalja (glasura), khajekh si gilabavde katar xoroske grupe. Agive, but roma ande Finlanda si aktivne ande e Devlikani muzika.

E Åkerlunds si laćhe źangle ande sa e Finlanda thaj o Śvedo naisaripenaske (palikeripenaske) vaś e Devlikane muzikalne aćhilenge pe save von baśalen, thaj i vaś e Devlikane albumura save von audioramosarde. E duj źene baśalde thaj i publikuisarde tradicionalne finikane romane gilja, save inklen katar o muzikalno palmukhipe ande savo von barile. Von mukhle palpale kadaja tradicija peske ćhejake, e Anette Åkerlund.

Barabari e khangerjake koncertonenca ande save e Tuula thaj o Valfrid si andrethode, von baśalen e Anette-sa ka romane muzikalne festivalja. Sar ekh familno banda, von phirde ka verver thana ande Europa, Azija thaj Amerika. O Valfrid Åkerlund si ekh studiano muzikanto. Ekh multi-instrumentalisto, vov baśalel po piano, gitara, thaj akordeono. Ando o Studio Miritz, savo vov sivol, vov audioramosarda e albumura vaś bute romane muzikantonenge ande e Finlanda.

Ćhib thaj śkolipenaske proektura

Ekh lungo kotor katar e Åkerlunds-enge gilja si ramosarde ando o finikano romano dialekto. Sar ekh kotor katar lengo sadipe ande e romani ćhib, ando o 1990-to berś e Tuula thaj o Valfrid kerde buki ćhavenca sar romane ćhibake sikavne ande e śkole ando o Helsinki regiono.

Len e dujen sas len bare kariere ande e romani politika. Dekatar o 2006-to berś, e Tuula Åkerlund si e direktora vaś o Romano Missio, em e purani romani asociajade ande Finlanda. O Romano Missio, kas si les upral katar e pandźvardeś (pinda) bukjarne, kerel buki ande e umal vaś e ćhavengo laćhipe-keripe thaj i ando o organiziripe vaś romane kulturne aćhila.

Ando o novembro 2017-to berś, o Romano Missio organizirisarda koncertura ando Helsinki thaj Turku te pakivsarel e śele berśengo berśipe vaś e finikani deklaracija vaś korkorutnipe. Maj but informacija śaj arakhadindol pe e uebrig vaś o Romano Missio.

E Anette Åkerlund

E Anette Åkerlund, e Tuula-ki thaj e Valfrid-eski ćhej, specializiril ande e duj flamenko thaj finikani romani performacija. Dekatar o 2009-to berś, voj sikili flamenko gilabavipe, tanco, thaj kompozicija ande institucije sar o Fundación Christina Heeren ande e Sevilla, o Centro de Arte y Flamenco de Sevilla, thaj o Escuela Superiór de Música Cataluña ande e Barselona.

O flamenko sas ekh vastno (importantno) kotor katar lake sikavipenata ande e Folkani Musikalno Kukhin ande e Sibelius Academija ando o Helsinki, kajte voj sikili gilabavipe, piano, improvizacija, moderno tanco, thaj kompozicija. Voj baśalda grupenca sar e Zugara, ekh ansamblo savo voj kerda e śvedikane flamenko gitaristosa o Patrik Bonnét, thaj Amaro, ande savo voj kidape e Miritza Lundberg-sa te gilabel romane gilja katar verver Europutne thema.

Voj kerda buki e proektosa Camerata Flamenco, kasa voj baśalda ka o festivalo Etnosoi! ando o Helsinki ando novembro 2015-to berś. Voj kerda ekh maestro koncerto ande e Sibelius Academija, ando savo voj anda ekhe thaneste e duj tradicije vaś peski phab (pasiona): finikane romane gilja thaj flamenko. Ekh albumo lako si ando keripe.

Rights held by: Anette Åkerlund (text) — Angel Ivanov (translation) | Licensed by: Anette Åkerlund (text) — Angel Ivanov (translation) | Licensed under: CC-BY-NC-ND 4.0 International | Provided by: RomArchive